ԱՄՆ նախագահ Դոնալդ Թրամփը հայտարարել է, որ Միացյալ Նահանգները դեռևս պետք է հարվածի Իրանում գտնվող մեկ կամ երկու թիրախի՝ ընդգծելով, որ անհրաժեշտության դեպքում ռազմական գործողությունը կարող է իրականացվել ընդամենը 10 րոպեում։ Միևնույն ժամանակ, նա նշել է, որ Վաշինգտոնը չի շտապում նոր հարվածներ հասցնել, իսկ Թեհրանը զգուշացրել է, որ ցանկացած նոր հարձակում կարժանանա անհապաղ պատասխանի։ Թրամփի խոսքով՝ ԱՄՆ-ն արդեն զգալիորեն թուլացրել է Իրանի ռազմական ներուժը և ոչնչացրել նրա միջուկային կարողությունները։ ԱՄՆ նախագահը, հոկտեմբերի 31-ին Ֆլորիդայում գտնվող իր նստավայրում լրագրողների հետ զրույցում անդրադառնալով Իրանի դեմ հնարավոր նոր ռազմական գործողություններին, հայտարարել է, որ դեռևս մեկ կամ երկու օբյեկտ մնում է թիրախավորել։ «Մենք ոչնչացրել ենք նրանց միջուկային ներուժը։ Դեռ պետք է զբաղվենք մեկ կամ երկու օբյեկտով, բայց դա կարող ենք անել ընդամենը 10 րոպեում», – ասել է նա։ Թրամփը մասնավորապես հիշատակել է Փիքաքս լեռան (Pickaxe Mountain) ստորգետնյա համալիրը՝ նշելով, որ այն նույնպես պետք է թիրախավորվի։ Իրանի իշխանությունները, սակայն, հերքում են, որ այդ տարածքում միջուկային գործունեություն է իրականացվում։ Անդրադառնալով բանակցություններին՝ ԱՄՆ նախագահը նշել է, որ Իրանի հետ պատերազմը դադարեցնելու շուրջ քննարկումները «լավ են ընթանում», թեև կասկածի տակ է դրել իրանական կողմի հուսալիությունը։
