Չինաստանը հաստատել է Ռուսաստանի և ԱՄՆ-ի հետ բանակցությունների անցկացումը՝ այս ամիս ԱԽՏՀ գագաթնաժողովի շրջանակում երեք երկրների առաջնորդների հանդիպում կազմակերպելու նպատակով։ Այս մասին հայտարարել է Չինաստանի արտաքին գործերի նախարարության պաշտոնական ներկայացուցիչ Մաո Նինը, հայտնում է Bloomberg-ը։ Գործակալության գնահատմամբ՝ նման հանդիպումը կարող է կարևոր նշանակություն ունենալ Ուկրաինա ներխուժումից հետո միջազգային մեկուսացումից դուրս գալու Ռուսաստանի ջանքերի համար, ինչպես նաև հնարավորություն տալ Չինաստանի նախագահ Սի Ծինփինին միջնորդել Վլադիմիր Պուտինի և Դոնալդ Թրամփի հանդիպման կազմակերպմանը։ Bloomberg-ը նշում է, որ Չինաստանի, Ռուսաստանի և ԱՄՆ-ի առաջնորդների եռակողմ գագաթնաժողովը ժամանակակից պատմության մեջ նախադեպ չի ունեցել։ Հնարավոր պատմական զուգահեռներից մեկը 1945 թվականի Յալթայի համաժողովն է, որին մասնակցել են ԽՍՀՄ առաջնորդ Իոսիֆ Ստալինը, ԱՄՆ նախագահ Ֆրանկլին Ռուզվելտը և Մեծ Բրիտանիայի վարչապետ Ուինսթոն Չերչիլը՝ քննարկելով հետպատերազմյան Եվրոպայի վերակառուցման հարցերը։
