Նոյեմբերի 3-ի երեկոյան Մոսկվա մեկնած «Էյր Սերբիայի» JU134 չվերթը, ճանապարհի մոտ կեսն անցնելուց հետո, շրջադարձ է կատարել և վերադարձել Բելգրադ։ Այս մասին վկայում են Flightradar24 ծառայության տվյալները։ Ավիաընկերության հայտարարության համաձայն՝ վերադարձի պատճառը ուղևորներից մեկի նկատմամբ անվտանգության լրացուցիչ ստուգումներ անցկացնելու անհրաժեշտությունն է եղել։ Սերբական N1 հեռուստաալիքի չհաստատված տեղեկություններով՝ ինքնաթիռը վերադարձվել է այն բանից հետո, երբ պարզվել է, որ անվտանգության նախաթռիչքային ստուգումը չի անցել Ալեքսանդր Վուլինը՝ «Սոցիալիստների շարժում» կուսակցության առաջնորդը և Սերբիայի նախկին նախագահ Ալեքսանդր Վուչիչի դաշնակիցը։ N1-ի տվյալներով՝ ինքնաթիռում է եղել նաև «Սերբիագազ» ընկերության գլխավոր տնօրեն Դուշան Բայատովիչը։ Վուլինը հայտարարել է, որ Մոսկվա էր մեկնում պաշտոնական այցով՝ գազային համաձայնագրի երկարաձգման շուրջ բանակցություններ վարելու նպատակով։ Միևնույն ժամանակ Բայատովիչը հեռուստաալիքին չի հաստատել Վուլինի հայտարարությունը՝ նշելով, որ իր այցը կապված էր գազի մատակարարումների և վճարումների հետ առաջացած խնդիրների հետ։ Դրանք, նրա խոսքով, առաջացել են սերբական Alta Bank բանկի լիցենզիայի հետկանչից հետո։
