Ղազախստանն ու Թուրքիան հերթական քայլն են կատարել ռազմավարական համագործակցության խորացման ուղղությամբ։ Երկկողմ բանակցությունների և Բարձր մակարդակի ռազմավարական համագործակցության խորհրդի վեցերորդ նիստի արդյունքներով՝ նախագահներ Կասիմ-Ժոմարտ Տոկաևը և Ռեջեփ Թայիփ Էրդողանը ստորագրել են Հավերժական բարեկամության և ընդլայնված ռազմավարական գործընկերության մասին հռչակագիր Ղազախստանի Հանրապետության և Թուրքիայի Հանրապետության միջև, հայտնում է inbusiness.kz-ն՝ հղում անելով Ակորդայի մամուլի ծառայությանը։ Բանակցություններից հետո պաշտոնական պատվիրակությունների անդամները փոխանակել են միջպետական, միջկառավարական և միջգերատեսչական փաստաթղթերի մեծ փաթեթ։ «Ստորագրված փաստաթղթերի փաթեթը վկայում է ղազախա-թուրքական հարաբերությունների՝ որակապես նոր մակարդակի անցման մասին։ Երկրների միջև համագործակցությունն ընդգրկում է ավելի ու ավելի շատ ուղղություններ՝ հումանիտար ոլորտից և կրթությունից մինչև բարձր տեխնոլոգիաներ, էներգետիկա և արդյունաբերություն։ Հավերժական բարեկամության և ընդլայնված ռազմավարական գործընկերության մասին հռչակագրի ստորագրումը ոչ միայն խորհրդանշական էր, այլև քաղաքականապես նշանակալի քայլ, որն ամրագրում է Աստանայի և Անկարայի միջև փոխգործակցության խորացման երկարաժամկետ կուրսը»,- նշվում է մամուլի ծառայության հաղորդագրության մեջ:
