Ուղիղ մեկ տարի առաջ այս օրը նախագահ Թրամփը խաղաղություն ապահովեց Հայաստանի և Ադրբեջանի միջև, երբ Սպիտակ տանը միասին հյուրընկալեց Ադրբեջանի նախագահ Ալիևին և Հայաստանի վարչապետ Փաշինյանին ու ներկա գտնվեց նրանց կողմից պատմական Համատեղ հռչակագրի ստորագրմանը: Այս հռչակագիրը վերջ դրեց Հարավային Կովկասում տասնամյակներ տևած հակամարտությանը և սկիզբ դրեց Միջազգային խաղաղության և բարգավաճման նորարարական Թրամփի երթուղուն՝ TRIPP-ին։ Այս մասին հայտնում է ԱՄՆ պետքարտուղար Մարկո Ռուբիոն։ «Անցած տասներկու ամիսների ընթացքում Միացյալ Նահանգները կողք կողքի աշխատել է Հայաստանի և Ադրբեջանի հետ՝ այդ խոստումն առաջընթացի վերածելու համար: TRIPP-ը՝ մուլտիմոդալ տարանցիկ երթուղին, որը կարդիականացնի երկաթուղային, ճանապարհային, էներգետիկ և թվային ենթակառուցվածքները, իրականություն դառնալու ճանապարհին է. Հայաստանում երկաթուղու ինժեներական ուսումնասիրություններն արդեն ընթացքի մեջ են, իսկ Ադրբեջանը մոտ է Հայաստանին կապող ավտոմայրուղու և երկաթուղու շինարարության ավարտին: Խաղաղությունը դուռ է բացել Միացյալ Նահանգների, Հայաստանի և Ադրբեջանի միջև հարաբերությունների ամրապնդման համար, ինչը կնպաստի բոլոր երեք երկրների տնտեսական բարգավաճմանը: Այսօր ուրախ եմ տեղեկացնել, որ Տրանսկասպյան ձեռնարկատիրական հիմնադրամն (Trans-Caspian Enterprise Fund) արդեն գործում է՝ նորընտիր տնօրենների խորհրդի ղեկավարությամբ և համալրված ԱՄՆ կառավարության 201 միլիոն դոլար ֆինանսավորմամբ, որի նպատակն է խթանել մասնավոր հատվածի ներդրումները Տրանսկասպյան առևտրային երթուղու (Միջին միջանցք) երկայնքով՝ Հարավային Կովկասում և Կենտրոնական Ասիայում: Այս առաջընթացն արտացոլում է մի պարզ ճշմարտություն. խաղաղությունն ու բարգավաճումը փոխադարձաբար ամրապնդում են միմյանց: TRIPP-ը ավելին է, քան ենթակառուցվածքային նախագիծ. այն կենսական օղակ է Տրանսկասպյան առևտրային երթուղում, առևտրային հնարավորությունների շարժիչ ուժ Միացյալ Նահանգների և այլոց համար, ինչպես նաև մոդել, թե ինչպես տնտեսական համագործակցությունը կարող է ամրապնդել խաղաղությունը երկարամյա վեճերի հանգուցալուծումից հետո: Միացյալ Նահանգները մնում է լիովին հանձնառու՝ աշխատելու Հայաստանի և Ադրբեջանի հետ, մինչ նրանք կառուցում են այս հիմքի վրա: Մենք շնորհավորում ենք երկու ազգերին այն քաջության և տեսլականի համար, որ նրանք ցուցաբերել են անցած տարվա ընթացքում, և ակնկալում ենք շարունակական առաջընթաց դեպի կայուն և տևական խաղաղություն Հարավային Կովկասում»,- նշվում է հաղորդագրությունում։
