Պակիստանի բանտում գտնվող նախկին վարչապետ Իմրան Խանը, ազատ արձակվելու դեպքում, չի գնա զինվորականների կամ բանակի հրամանատար Ասիմ Մունիրի հետ առճակատման ճանապարհով. Reuters-ին հայտնել է Խանի մերձավոր աջակիցներից մեկը՝ Մունիրին ներկայացնելով որպես գործիչ, որը կարող է «բուժիչ ձեռք» մեկնել՝ այս շաբաթ տեղի ունեցած իրավական շրջադարձից հետո։ Այս հայտարարությունները հնչել են այն բանից հետո, երբ Պակիստանի Գերագույն դատարանը որոշում է կայացրել Խանին բուժման նպատակով հիվանդանոց տեղափոխելու վերաբերյալ։ Դրանք, ըստ էության, վկայում են նրա «Պակիստանի շարժում հանուն արդարության» (PTI) կուսակցության հռետորաբանության հնարավոր փոփոխության մասին։ Խանի կողմնակիցները տարիներ շարունակ կոշտ քննադատության են ենթարկել Ասիմ Մունիրին՝ նրան մեղադրելով 2023 թվականին Խանի ձերբակալության և բանտարկության մեջ։ Այդ ժամանակ Խանի և երկրի ռազմական ղեկավարության միջև հարաբերությունները կտրուկ սրվել էին։ Ինքը՝ Խանը, որը նախկինում եղել է հայտնի կրիկետիստ, Մունիրին անգամ անվանել էր «հոգեպես անհավասարակշիռ»։ Սակայն չորեքշաբթի օրը Reuters-ին տված հարցազրույցում Խանի մերձավոր աջակից և PTI-ի մամուլի քարտուղար Զուլֆիքար Բուխարին հստակ ազդանշան է տվել, որ կուսակցությունը կարող է պատրաստ լինել զինվորականների հետ հաշտության։ Նման քայլը կարող է թուլացնել Պակիստանի վերջին տարիների ամենասուր քաղաքական հակամարտություններից մեկը։ Միևնույն ժամանակ, դեռևս պարզ չէ՝ արդյոք Խանն անձամբ կիսում է այդ դիրքորոշումը։ «Եթե Իմրան Խանին վաղը, հիպոթետիկորեն, ազատ արձակեին, նա չէր անի որևէ բան, որը կարող էր էական վնաս հասցնել երկրին»,- ասել է Բուխարին՝ Խանին բնութագրելով որպես «վեհանձն» քաղաքական գործիչ։
