Ուկրաինայի նախագահ Վլադիմիր Զելենսկին հայտարարել է, որ Ռուսաստանի և Ուկրաինայի միջև պատերազմի արագ ավարտն այս պահին չի ակնկալվում։ Կիևում ԱՄՆ ներկայացուցիչներ Սթիվ Ուիթքոֆի և Ջարեդ Քուշների հետ բանակցություններից հետո Զելենսկին նշել է, որ եթե ռազմական գործողությունները շարունակվեն մինչև ձմեռ, Ուկրաինային արևմտյան դաշնակիցներից անհրաժեշտ կլինի առանձին «ձմեռային փաթեթ»։ Զելենսկին ամերիկյան ներկայացուցիչների հետ հանդիպումները որակել է որպես «չափազանց բովանդակալից»։ Միաժամանակ նա կատակել է, որ Ուիթքոֆի և Քուշների ներկայությունը Կիևում «ավելի լավ աշխատեց, քան Patriot» հակաօդային պաշտպանության համակարգերը։ Նրա խոսքով՝ ամերիկացի պաշտոնյաների այցի ընթացքում ՌԴ նախագահ Վլադիմիր Պուտինը հայտարարել էր Կիևի ուղղությամբ հարվածների եռօրյա դադարի մասին, իսկ Ուկրաինան, իր հերթին, զերծ էր մնացել Մոսկվայի ուղղությամբ հարձակումներից։ Ուկրաինայի նախագահի խոսքով՝ առաջիկայում նախատեսվում են նոր բանակցություններ Ուկրաինայի, եվրոպական երկրների և ԱՄՆ-ի մասնակցությամբ։ Միևնույն ժամանակ Զելենսկին ընդգծել է, որ առանցքային հարցերը, այդ թվում՝ տարածքային խնդիրները, հնարավոր է լուծել միայն պետությունների ղեկավարների մակարդակով հանդիպման ընթացքում։ Բանակցությունների արդյունքների վերաբերյալ դրական գնահատականներ են հնչեցրել նաև ԱՄՆ ներկայացուցիչները։ Սթիվ Ուիթքոֆը հայտարարել է, որ Մոսկվայում բանակցությունների ընթացքում առաջընթաց է արձանագրվել, և ամերիկյան կողմը նոր գաղափարներ է բերել Կիև։ «Մենք առաջընթացի ենք հասել Մոսկվայում։ Մենք ունենք նոր գաղափարներ և դրանք բերել ենք Կիև»,- ասել է Ուիթքոֆը։ Իր հերթին Ջարեդ Քուշները հանդես է եկել Ուկրաինայի, Ռուսաստանի և ԱՄՆ-ի միջև եռակողմ բանակցությունները վերսկսելու օգտին։ Նրա հայտարարությունը վկայում է, որ Վաշինգտոնը շարունակում է քննարկել հակամարտության կարգավորման գործընթացի վերականգնման հնարավորությունը՝ երեք կողմերի անմիջական մասնակցությամբ։
