Կրեմլում նպատակադրված չեն հանրային ձևաչափով քննարկել ուկրաինական հակամարտության կարգավորմանը վերաբերող հնարավոր կետերը,- հայտնել է Ռուսաստանի նախագահի մամուլի քարտուղար Դմիտրի Պեսկովը: ԱՄՆ պետքարտուղար Մարկո Ռուբիոն ավելի վաղ հայտարարել էր, որ Մոսկվայում և Կիևում ԱՄՆ ներկայացուցիչների շփումներից հետո առաջիկա շաբաթներին հնարավորություն կստեղծվի մշակելու ճանապարհային քարտեզ՝ Ուկրաինայի հարցով եռակողմ բանակցությունները վերսկսելու համար: «Մենք չէինք ցանկանա և հանրային ձևաչափով չենք քննարկի որևէ կետ»,- ասել է Պեսկովը։ Նա հստակեցրել է, որ այս պահին կարգավորման վերաբերյալ որևէ ձևակերպված ծրագիր չկա, սակայն կա ընդհանուր քաղաքական ցանկություն՝ վերսկսելու եռակողմ բանակցությունները:
