Մեծ Բրիտանիայի թագավոր Չարլզ III-ը Լոնդոնում դիտել է Բայոյի հայտնի գոբելենը՝ նշելով, որ ինքը դրա վրա պատկերված Նորմանդիայի դուքս Վիլհելմի անմիջական ժառանգն է։ Վիլհելմի բանակը 1066 թվականին ներխուժել էր Բրիտանական կղզիներ և Հասթինգսի ճակատամարտում պարտության մատնել թագավոր Հարոլդին։ Գրեթե 1000 տարվա պատմություն ունեցող գոբելենը մոտ 70 մետր երկարությամբ ասեղնագործություն է, որը պատկերում է այդ իրադարձություններին նախորդած պատմությունը։ Գոբելենը Մեծ Բրիտանիա տեղափոխելիս դրա պահպանության համար հսկայական ջանքեր են գործադրվել, սակայն նախկինում այն միշտ չէ, որ ունեցել է այդքան հոգատար վերաբերմունք։ Ենթադրվում է, որ գոբելենի վերջին տեսարանները կորել կամ ոչնչացվել են։ Մոտ 1000 տարվա պատմություն ունեցող կտավը տեղափոխելու վտանգի վերաբերյալ մտահոգություններ կային, սակայն Ֆրանսիայի կառավարության աղբյուրները Բրիտանական թանգարանում դրա ցուցադրման պայմանները «իդեալական» են անվանել։ Գոբելենը ցուցադրվելու է հորիզոնական՝ ամբողջությամբ փռված վիճակում, քանի որ համարվում է, որ դա ավելի լավ է մանրաթելերի պահպանության համար։ Այն ներառում է 58 տեսարան, 627 մարդկային կերպար, 737 կենդանի և 37 նավ։ Գոբելենը սովորաբար ցուցադրվում է Ֆրանսիայի Բայո քաղաքի թանգարանում։ Այն Լոնդոն տեղափոխելու համար հատուկ միջոցներ են ձեռնարկվել՝ գրեթե 1000-ամյա գործվածքը հնարավոր վնասներից պաշտպանելու համար։ Ցուցահանդեսի տոմսերը մեծ պահանջարկ են ունեցել և ամբողջությամբ սպառվել են մինչև 2026 թվականի վերջը։
