Ուկրաինայի գլխավոր դատախազ Ռուսլան Կրավչենկոն սեպտեմբերի 14-ի գիշերը լքել է երկիրը՝ ՆԱԲՈւ-ի և ՍԱՊ-ի հասցեին մի շարք մեղադրանքներ հնչեցնելուց հետո։ Նրա՝ արտերկիր մեկնելու մասին նախ հայտնել է «Ուկրաինսկայա պրավդա»-ն՝ հղում անելով իրավապահ մարմիններում իր աղբյուրներին։ Աղբյուրների փոխանցմամբ՝ Կրավչենկոն սահմանը հատել է ծառայողական ավտոմեքենայով։ Ավելի ուշ գլխավոր դատախազը հաստատել է, որ գտնվում է արտերկրում՝ նշելով, որ գործուղման շրջանակում մի շարք հանդիպումներ է նախատեսել։ Կրավչենկոյի հայտարարությունը հրապարակվել է նրա ելույթից մոտ մեկուկես ժամ անց, որի ընթացքում նա հայտնել էր ՆԱԲՈւ-ի տնօրեն Սեմեն Կրիվոնոսին կասկածանք ներկայացնելու մասին։ Կրավչենկոյի խոսքով՝ արտերկրյա հանդիպումների ընթացքում նա պատրաստվում է միջազգային գործընկերներին ներկայացնել իր գնահատմամբ Ուկրաինայի հակակոռուպցիոն մարմիններում ստեղծված իրավիճակը։ Նա հայտարարել է, որ այդ կառույցների կողմից «չվերահսկվող ազդեցության կենտրոնացման» նշաններ է տեսնում և պնդել, որ նման գործելակերպը կարող է ռիսկեր ստեղծել պետական ինքնիշխանության, օրենքի գերակայության և ժողովրդավարական ինստիտուտների համար։ Կրավչենկոյի արտերկիր մեկնելու հանգամանքները և գործուղման ժամկետները չեն մանրամասնվել։
