Nvidia-ի համահիմնադիր և գործադիր տնօրեն Ջենսեն Հուանգը հայտարարել է, որ մինչև 2030 թվականը արհեստական բանականության (AI) զարգացման հետևանքով մարդկության վերացման հավանականությունը «0%» է։ CBS News-ին տված հարցազրույցում Հուանգը AI-ի կողմից մարդկության ոչնչացման մասին կանխատեսումները անվանել է չափազանցված և «աշխարհի վերջի մասին պատմություններ»։ Նրա խոսքով՝ AI-ի պատճառով աշխարհի վերջի մասին մարդկանց վախեցնելն անպատասխանատու է, իսկ նման կանխատեսումները գիտական հիմք չունեն։ Հուանգը նաև քննադատել է AI-ի անվտանգության ոլորտում նոր օրենքների մասին ընկերությունների կոչերը՝ նշելով, որ արդեն գոյություն ունեն օրենքներ, որոնք կարող են կիրառվել տեխնոլոգիայի հնարավոր վնասների դեպքում։ Միևնույն ժամանակ, AI-ի արագ զարգացումը շարունակում է մտահոգություններ առաջացնել։ Anthropic-ի, OpenAI-ի և այլ ընկերությունների ղեկավարներ հանդես են եկել տեխնոլոգիայի զարգացման դանդաղեցման օգտին, իսկ տարբեր երկրներ քննարկում են դրա անվտանգության կարգավորման հարցը։
