Իրանի խորհրդարանը մշակել է Միջուկային զենքի չտարածման մասին պայմանագրից դուրս գալու մասին օրինագիծ։ Fars գործակալությունը տեղեկացնում է, որ այս մասին հայտնել է Իրանի խորհրդարանի փոխխոսնակ Ալի Նիկզադը։ Նրա խոսքով՝ նախաձեռնությունը ներկայում ուսումնասիրման փուլում է, այդ թվում՝ դրա միջազգային հետևանքների գնահատման առումով։ Փոխխոսնակը հավելել է, որ փաստաթուղթը լիագումար նիստին կներկայացվի որպես հրատապ նշանակության հարց, ինչը օրենսդիրներից կպահանջի այն քննարկել նույն օրը։ Նիկզադը հիշեցրել է, որ Իրանը դադարեցրել է համագործակցությունը Ատոմային էներգիայի միջազգային գործակալության (ԱԷՄԳ) հետ 2025 թ. սեպտեմբերին։ Նա նշել է, որ Իրանը չի վստահում ԱԷՄԳ գլխավոր տնօրեն Ռաֆայել Գրոսիին, քանի որ վերջինս մակերեսային ստուգումներ է անցկացնում, «գովասանքի խոսքեր հնչեցնում, սակայն հեռանալուց հետո Իրանի դեմ բացասական զեկույց հրապարակում»։
