ԱՄՆ Գերագույն դատարանը սեպտեմբերի 29-ին վերացրել է ներգաղթյալներին երրորդ երկրներ արտաքսելու սահմանափակումները՝ միաժամանակ համաձայնելով դեկտեմբերին քննել այդ հարցը։ Այս մասին հաղորդում է France 24 պարբերականը։ Դատարանը բավարարել է ԱՄՆ նախագահ Դոնալդ Թրամփի վարչակազմի արտակարգ միջնորդությունը՝ կասեցնելով ավելի ցածր ատյանի դատարանի որոշումը, որը սահմանափակում էր, սակայն ամբողջությամբ չէր արգելում ներգաղթյալների արտաքսումները երրորդ՝ ոչ իրենց հայրենի երկրներ։ Ավելի ցածր ատյանի դատարանը հայտարարել էր, որ արտաքսման ենթակա անձինք նախապես պետք է պատշաճ և արդյունավետ կերպով տեղեկացվեն այն մասին, թե ուր են ուղարկվելու, որպեսզի հնարավորություն ունենան բարձրաձայնելու հնարավոր հետապնդման վերաբերյալ իրենց մտահոգությունները։ Դոնալդ Թրամփը նախընտրական արշավի ընթացքում խոստացել էր միլիոնավոր անօրինական ներգաղթյալների արտաքսել Միացյալ Նահանգներից և 2025 թվականին Սպիտակ տուն վերադառնալուց հետո մի շարք քայլեր է ձեռնարկել՝ արտաքսումներն արագացնելու նպատակով։ Թրամփի վարչակազմը երրորդ երկրներ արտաքսումները հիմնավորել է որպես անհրաժեշտ միջոց, քանի որ արտաքսման ենթակա որոշ անձանց հայրենի երկրները երբեմն հրաժարվում են ընդունել նրանց։ AFP-ի հետաքննությունը պարզել է, որ ԱՄՆ-ն, այսպես կոչված, «երրորդ երկրներին», հատկապես՝ Աֆրիկայում գտնվող երկրներին, միլիոնավոր դոլարի գործարքներ է առաջարկել և սպառնացել է սահմանափակել վիզաների տրամադրումը, որպեսզի դրդի նրանց ընդունել արտաքսված անձանց։ Ըստ գործակալության՝ այս երկրներ տեղափոխվելուց հետո արտաքսված անձինք ենթարկվել են տեղի պահակների կողմից բռնությունների, անորոշ ժամկետով կալանքի կամ արագ կրկին արտաքսվել են իրենց հայրենի երկրներ։ Կոնգրեսը որպես ԱՄՆ-ի քաղաքականություն է սահմանել այն, որ մարդիկ չարտաքսվեն այնպիսի երկրներ, որտեղ նրանց կյանքը կարող է վտանգի ենթարկվել կամ նրանք կարող են ենթարկվել խոշտանգումների։
