Եվրամիության երկրները քննարկում են Ռուսաստանից հնարավոր լայնածավալ հիբրիդային հարձակման սցենարը, որը կարող է մարդկային զոհերի պատճառ դառնալ։ Politico-ի տվյալներով՝ վերջին շաբաթներին ԵՄ բոլոր 27 երկրների դեսպանները փակ հանդիպումների ընթացքում քննարկել են նման իրավիճակին միասնական արձագանքելու տարբերակները։ Քննարկումներն ակտիվացել են Գերմանիայի Լայպցիգի օդանավակայանում օգոստոսին պայթուցիկով զինված անօդաչու թռչող սարքերի հայտնաբերումից հետո։ Գերմանիայի իշխանությունները այդ միջադեպի համար պատասխանատու են համարել Ռուսաստանին, մինչդեռ Մոսկվան հերքել է մեղադրանքները։ Գերմանիայի կանցլեր Ֆրիդրիխ Մերցը նույնպես հայտարարել է, որ երկիրը պատրաստվում է Ռուսաստանի կողմից հնարավոր նոր հիբրիդային հարձակումների, այդ թվում՝ լուրջ միջադեպերի։ Politico-ի եվրոպացի դիվանագետների և պաշտոնյաների տվյալներով՝ ԵՄ-ն քննարկում է արտակարգ արձագանքման խմբերի ձևավորումը, տուժած երկրի համար ֆինանսական միջոցների հատկացումը և նման հարձակման դեպքում հասարակությանը տեղեկատվություն փոխանցելու միասնական մոտեցումը։ ԵՄ-ն արդեն աշխատում է հիբրիդային սպառնալիքներին, այդ թվում՝ կիբերհարձակումներին, դիվերսիաներին և անօդաչու սարքերի միջադեպերին արձագանքելու մեխանիզմների վրա։ Միաժամանակ Ռուսաստանը բազմիցս հերքել է եվրոպական երկրների մեղադրանքները՝ դրանք անվանելով անհիմն։
