Մոսկվայում ԱՄՆ դեսպանատան աշխատակիցները մեծ հետաքրքրություն են ներկայացնում «Թրամփովկա» անվանումը ստացած կարմիր խավիարի նկատմամբ։ Խաբարովսկի երկրամասի նահանգապետ Դմիտրի Դեմեշինի խոսքով՝ ապրանքը վաճառվում է դեսպանատան հարևանությամբ գտնվող «Արտադրված է Խաբարովսկի երկրամասում» խանութների ցանցում։ Դեմեշինը նշել է, որ այս տարի սաղմոնազգի ձկների որսը նվազել է, ուստի խավիարը սովորականից քիչ կլինի։ Նրա խոսքով՝ «Թրամփովկան» արագ սպառվում է, քանի որ ամերիկյան դեսպանատան աշխատակիցները հաճախ են այցելում խանութ։ Ապրանքը հայտնվել է այն բանից հետո, երբ ԱՄՆ նախագահի հատուկ ներկայացուցիչ Սթիվ Ուիթքոֆը Դոնալդ Թրամփին Խաբարովսկից կարմիր խավիարի արկղ է նվիրել։ Դրանից հետո ապրանքի նկատմամբ հետաքրքրությունն աճել է, և այն ստացել է «Թրամփովկա» անվանումը։
