«Մաթել» ընկերությունը հայտարարել է երգչուհի Սելին Դիոնի կերպարով «Barbie Signature» հավաքածուի տիկնիկի թողարկման մասին։ Այն ոգեշնչված է 1998 թվականին «Օսկար»-ի մրցանակաբաշխության ժամանակ Դիոնի կատարած «My Heart Will Go On» երգով, որը հնչել է «Տիտանիկ» ֆիլմում։ Տիկնիկը կրում է երգչուհու հայտնի կերպարի կրկնօրինակը՝ երկարաթև, մինչև հատակ հասնող, օվկիանոսի կապույտ գույնի զգեստը, որով Դիոնը ելույթ է ունեցել «Օսկար»-ի 70-րդ մրցանակաբաշխության ժամանակ՝ 1998 թվականի մարտի 23-ին, Լոս Անջելեսում։ Տիկնիկի հավաքածուում ներառված է նաև «Օվկիանոսի սիրտը» (Heart of the Ocean) հայտնի վզնոցի կրկնօրինակը։ Ֆիլմում այդ զարդը պատկանում էր Ռոուզ Դեվիթ Բյուքեյթերին՝ Քեյթ Ուինսլեթի և Գլորիա Ստյուարտի մարմնավորմամբ։ Տիկնիկի նախնական պատվերները հասանելի են դարձել «Barbie 59 Club»-ի անդամների համար՝ 69,99 դոլարով։
