Ֆրանսիայի նախագահ Էմանուել Մակրոնը հայտարարել է, որ սոցիալական ցանցերը նպաստել են երկրում բողոքի ցույցերն ուղեկցած անկարգությունների մասնակիցների մոբիլիզացմանը և վնասում են ժողովրդավարությանը։ Մակրոնն այս մասին ասել է հոկտեմբերի 26-ին Մարսել կատարած այցի ընթացքում։ «Սոցիալական ցանցերը վնասում են մեր ժողովրդավարություններին, քանի որ խորացնում են բևեռացումը, բռնության տեսարանների առջև յուրատեսակ շոկ և կաթված են առաջացնում»,– հայտարարել է Ֆրանսիայի նախագահը։ Նրա խոսքով՝ հոկտեմբերի 17-ի անկարգությունների ժամանակ սոցիալական հարթակներն օգտագործվել են երիտասարդներին և ավելի մեծ տարիքի մարդկանց այն վայրեր ուղղորդելու համար, որտեղ հարձակումներ, թալան և այլ հանցավոր գործողություններ էին կատարվում։ Միաժամանակ Ֆրանսիայի նախագահն ընդունել է բողոքի շարժման հիմքում ընկած օրինական պահանջներին արձագանքելու անհրաժեշտությունը։ Նա հայտնել է, որ կառավարությունը պատրաստում է կրթության և բուհեր ընդունվելու հարցերին վերաբերող միջոցառումներ։ Մակրոնը նախազգուշացրել է, որ հոկտեմբերի 31-ին նախատեսվող նոր ցույցերը նույնպես կարող են վտանգներ պարունակել հասարակական կարգի համար։ Ֆրանսիայում բողոքի շարժումը սկսվել է սեպտեմբերի կեսերին՝ դպրոցներում ուսուցման պայմանների, ուսուցիչների պակասի և ենթակառուցվածքների խնդիրների պատճառով։ Հետագայում ցույցերին միացել են նաև կյանքի թանկացման և ոստիկանության գործողությունների դեմ բողոքողներ։ Հոկտեմբերի 17-ի ակցիաներն ուղեկցվել էին հրդեհներով, թալանով և ոստիկանության հետ բախումներով։
