Իսրայելի խորհրդարանական ընտրություններում վարչապետ Բենիամին Նեթանյահուի և նրա գլխավոր մրցակից Գադի Այզենկոտի ուժերը չեն ապահովել կառավարություն ձևավորելու համար անհրաժեշտ մեծամասնությունը։ CNN-ի փոխանցմամբ՝ քվեարկության նախնական արդյունքները ցույց են տալիս, որ 120 տեղանոց Քնեսեթում որևէ քաղաքական ուժի ճամբար չի կարողացել ստանալ անհրաժեշտ 61 մանդատը։ Քվեների կեսից ավելին հաշվարկելուց հետո Channel 12-ի և Ynet-ի կանխատեսումներով՝ Նեթանյահուի դաշինքը կարող է ստանալ 55 տեղ՝ նախորդ խորհրդարանում ունեցած 68-ի փոխարեն։ Նրա «Լիկուդ» կուսակցությունը, այնուամենայնիվ, կարող է մնալ ամենամեծ առանձին քաղաքական ուժը։ Միևնույն ժամանակ, Նեթանյահուին դեմ հանդես եկող կուսակցությունները միասին կարող են ստանալ 65 մանդատ։ Սակայն ընդդիմությունը պառակտված է․ Գադի Այզենկոտի «Յաշար» կուսակցությանն անհրաժեշտ կլինի համագործակցել արաբական կուսակցությունների հետ, որոնք, ըստ կանխատեսումների, կարող են ունենալ 16 մանդատ։ Ընդդիմության որոշ առաջնորդներ դեմ են նման համագործակցությանը։ Ընտրություններում գրանցվել է 1999 թվականից ի վեր ամենաբարձր մասնակցությունը՝ առնվազն 77,7 տոկոս։ Հատկապես ակտիվ է եղել արաբ բնակչությունը, որի մասնակցությունը, ըստ արաբական կուսակցությունների, գերազանցել է 75 տոկոսը։ Նրանք ակնկալում են պատմականորեն բարձր արդյունք։ Նեթանյահուն և Այզենկոտը դեռ չեն հայտարարել վերջնական հաղթանակի մասին։ Այզենկոտը, սակայն, հայտարարել է, որ ընտրողները դեմ են արտահայտվել Նեթանյահուի՝ վարչապետի պաշտոնում շարունակելուն։ Վերջնական արդյունքների հաստատումից հետո Իսրայելի նախագահ Իսահակ Հերցոգը խորհրդակցություններ կանցկացնի խորհրդարան անցած կուսակցությունների հետ և վարչապետի թեկնածուներից մեկին կառավարություն ձևավորելու մանդատ կտա։ Թեկնածուն պետք է կարողանա ապահովել առնվազն 61 պատգամավորի աջակցությունը։ Եթե դա չհաջողվի, հնարավոր է՝ երկիրը կրկին արտահերթ ընտրությունների գնա։
