Ֆրանսիայի երեք տարածաշրջանային արյան բանկերի սառնարանային համակարգերը ենթարկվել են կիբեռհարձակման։ Միջադեպը տեղի է ունեցել կիրակիից երկուշաբթի գիշերը՝ եվրոպական մի շարք երկրներում սուպերմարկետների սառնարանային համակարգերի վրա իրականացված համաժամանակյա հարձակումների ֆոնին։ Ֆրանսիայի առողջապահության նախարարության հաղորդմամբ՝ կիբեռանվտանգության միջադեպը թիրախավորել է Արյան ֆրանսիական հաստատության (EFS) մի քանի տարածաշրջանային ստորաբաժանումների սառնարանային պահեստների վերահսկման և կառավարման համակարգերը։ Այդուհանդերձ, միջադեպը չի ազդել արյան պաշարների վրա։ Մոտավորապես նույն ժամանակահատվածում հաքերները միջամտել են նաև եվրոպական ութ երկրների խանութների սառնարանային համակարգերի աշխատանքին՝ ստիպելով առևտրային ցանցերին ոչնչացնել մեծ քանակությամբ սննդամթերք։ Հարձակումը նման է Ֆրանսիայում երեք շաբաթ առաջ տեղի ունեցած միջադեպին, որի ժամանակ տասնյակ սուպերմարկետներ էին տուժել։ Ներկայումս հետաքննություն է ընթանում՝ պարզելու, թե ինչպես է իրականացվել հարձակումը, ինչ սարքավորումներ են տուժել և երբ հնարավոր կլինի անվտանգ կերպով վերագործարկել համակարգերը։
