NASA-ն շարունակում է մշակել «Artemis» ծրագրի տիեզերագնացների ուսուցման ծրագիրը։ Նրանցից մի քանիսը կարող են Լուսնի մակերևույթ իջնել նախատեսվող «Artemis IV» առաքելության ընթացքում։ Այդ նախապատրաստական աշխատանքների շրջանակում NASA-ի երկու գիտնական վերջերս հագել է Artemis-ի լուսնային տիեզերազգեստները և փորձարկումներ իրականացրել գործակալության ստորջրյա ուսումնական կենտրոնում։ NASA-ի տվյալներով՝ գիտնականները փորձարկել են լուսնային բեռնվածքի նմանակված սարքի տեղադրումը՝ թույլ լուսավորության պայմաններում։ Գործակալությունը նախատեսում է տիեզերագնացներին ուղարկել Լուսնի հարավային բևեռ, որտեղ բազմաթիվ տարածքներ մշտապես գտնվում են ստվերում։ Այդ պատճառով լուսնային ապագա հետազոտողները ստիպված կլինեն աշխատել գրեթե լիակատար մթության պայմաններում և սովորել իրականացնել առաքելությունները նվազագույն լուսավորությամբ։ NASA-ի հայտարարության համաձայն՝ սա առաջին դեպքն էր, երբ երկու երկրաբան միաժամանակ կրել է լուսնային տիեզերազգեստներ և մասնակցել Լուսնի երկրաբանության ուսուցման փորձարկմանը այդ լաբորատորիայում։
