Կորեայի Հանրապետության Panstar Acro կոնտեյներային նավը ժամանել է Մեծ Բրիտանիայի Ֆելիքսթոու նավահանգիստ՝ Հյուսիսային ծովային ճանապարհով Արկտիկական ջրերով անցնելուց հետո։ Ինչպես հաղորդում է «ՏԱՍՍ»-ը, այս մասին հայտնում է Yonhap լրատվական գործակալությունը։ Գործակալությունը նշում է, որ նավը Բուսանից մեկնել է օգոստոսի 22-ին և Ֆելիքսթոու նավահանգիստ է ժամանել սեպտեմբերի 12-ին, Սեուլի ժամանակով ժամը 5:00-ի սահմաններում։ Ճանապարհորդությունը տևել է 21 օր: Սա կորեական նավագնացության ընկերության կոնտեյներային նավի առաջին առևտրային ճանապարհորդությունն է Հյուսիսային ծովային ճանապարհով: Նավի վրա եղել են քիմիական արտադրանք, օգտագործված մեքենաներ և պահեստամասեր՝ ընդհանուր առմամբ 737 TEU բեռ, ինչպես նաև 100 դատարկ կոնտեյներ:
