Կոսովոյի նախկին նախագահ և վարչապետ Հաշիմ Թաչին Հաագայի Կոսովոյի մասնագիտացված պալատների կողմից մեղավոր է ճանաչվել ռազմական հանցագործությունների մի շարք դրվագներով և դատապարտվել 25 տարվա ազատազրկման։ Դատարանը Թաչիին մեղավոր է ճանաչել սպանությունների, խոշտանգումների, դաժան վերաբերմունքի և ապօրինի ձերբակալությունների համար։ Գործով անցնող ևս երեք նախկին հրամանատարներից Յակուպ Կրասնիչին դատապարտվել է 25, Ռեջեփ Սելիմին՝ 13, իսկ Կադրի Վեսելին՝ 18 տարվա ազատազրկման։ Բոլոր մեղադրյալները իրենց մեղավոր չեն ճանաչել։ Դատարանը, սակայն, չորս նախկին հրամանատարներին արդարացրել է մարդկության դեմ հանցագործությունների վեց դրվագներով՝ նշելով, որ մեղադրող կողմը բավարար չափով չի ապացուցել քաղաքացիական բնակչության դեմ լայնածավալ և համակարգված հարձակման փաստը։ Դատավճիռը կարող է բողոքարկվել։ Թաչին Կոսովոյի ազատագրական բանակի նախկին առաջնորդներից է։ Նա Կոսովոյի նախագահն էր մինչև 2020 թվականը, երբ հրաժարական տվեց և տեղափոխվեց Հաագա՝ իրեն առաջադրված մեղադրանքներից հետո։ Գործի քննությունը տևել է շուրջ երեք տարի։
