Աստղագետները հայտնաբերել են «WD J1330+6435» սպիտակ թզուկը, որը կարող է կանաչ երանգ ունենալ իր շուրջը պտտվող մոլորակների քարքարոտ նյութերը կլանելու հետևանքով։ Գիտնականներն այն համեմատում են տիեզերական «զոմբիի» հետ, որը սնվում է մոլորակների մնացորդներով։ Երկրից մոտ 326 լուսատարի հեռավորության վրա գտնվող աստղի մթնոլորտում հայտնաբերված կալցիումը, լիթիումը և նատրիումը կարող են բացատրել դրա անսովոր գույնը։ Սպիտակ թզուկներն առաջանում են, երբ աստղերը սպառում են իրենց միջուկային վառելիքը և փլուզվում սեփական ձգողության ազդեցությամբ։ Նոր հետազոտությունը ցույց է տալիս, որ դրանց գույնը կարող է լինել ոչ միայն սպիտակ կամ կապտավուն, այլև կանաչ, վարդագույն, դեղին և մանուշակագույն՝ կախված մթնոլորտի քիմիական բաղադրությունից։
